Аудандық жастармен жұмыс жөніндегі ресурстық орталығының ұйымдастыруымен, Бөкей ордасы колледжінде студенттер арасында қазақы салт-дәстүрді дәріптеген "Бозбала мен Бойжеткен" байқауы өтті. Байқауға қатысқан "Асыл жүрек", "Екі лебіз", "Мөлдір сезім", "Қос жұлдыз" атты жұптар байқау шартына сай, "Таныстыру", "Тосын сый", "Талант шоу", "Ел мақтаған жігітті қыз жақтаған", "Қыздарға әсемдік жарасады" аталымдары бойынша сынға түсті.

Сайқын ауылында тыл ардагері, ауданның "Құрметті азаматы" М.Есмағұловтың 90 жылдығына арналған ерлер арасында волейболдан жарыс өтті. Тартысты өткен бәсекеде 1 орынды аудандық балалар-жасөспірімдер спорт мектебі жеңіп алса, 2-3 орындарды сәйкесінше, А.Құсайынов пен М-С.Бабажанов атындағы орта мектептердің командаларына бұйырды.

Бүгін 22 наурыз - Ұлыстың ұлы күнi. Бұл күнi күн мен түн теңеледi. Табиғат та, Жер-Ана да, жан-жануар да түлейдi, жаңарады. Адамзаттың бойында қан жүгiрiп, тал-теректер бүршiк жарады. Қазақтың сайын даласын Қызыр баба кезiп, адам баласына құт-береке, бақ-дәулет сыйлайды. Самарқанның көк тасы ерiп, қасиеттi қара жер, қара топырақ бусанады. Ұлы даланың төсiнде қызғалдақтар құлпыра өсiп, бел-белестерге қызылды-жасылды кiлем төселедi. Ұлан-байтақ Қазақстанның халқы жетi түрлi дәмнен наурыз көже жасап, ұлттық салт-дәстүр, әдет-ғұрыптарды сақтап, ай бойы Ұлыстың Ұлы күнiн тойлайды. Бүкiл Шығыс халқына ортақ бұл мейрамда араздасқандар татуласып, дүйiм халық, мұқым ел ауызбiршiлiкте болады.

14 наурыз - Көрісу мейрамы. Көрісу күнінде халық қыстан аман-есен шыққанына қуанып, бір-бірімен қол алысады. Таң сібірлеп атысымен, көрісу мерекесін асыға күтіп отырған әрбір отбасы алдын ала дайындалып қойған дастарханын жаяды. Міндетті түрде бауырсақ пісіріп, дастарханға тәтті-пәттісімен қосып үйіп қояды. Отбасының кішілері үлкендеріне қос қолын беріп, көрісіп шығады. Бір–біріне «Бір жасыңмен!» дейді. Ол «Бір жасқа есеюіңмен! Осы жылға аман-есен жетуіңмен!» дегенді білдіреді.

Хан ордасы ауылында қазақтың ұлттық кіим түрлеріне арналған "Нәзік" тігін шеберханасының иесі Н.Уразгелдиеваның ұлттық нақышта тігілген киімдерінің "Ұлттық киім - ұлт айнасы" атты көрсетілімі өтті.