Aitkaliev

Т.А.Ә.: Айтқалиев Ержан Жексенұлы

Лауазымы: Бөкей ордасы ауданы әкімі аппаратының басшысы, әдеп жөніндегі уәкіл

Мекенжайы: Бөкей ордасы ауданы, Сайқын ауылы, Т.Жароков көшесі, 31-үй, 302-кабинет

Телефон: 8(71140)21-130

Қабылдау кестесі: Әр айдың бірі күні сағат 15.00-ден 17.00-ге дейін

 


ӘДЕП ЖӨНІНДЕГІ УӘКІЛ

міндеті мен қызметі

Мемлекеттiк қызметшiлердiң моральдық-адамгершiлік бейнесiне, iскерлiк қасиеттеріне қойылатын талаптарды жоғарылату, Елбасының «100 нақты қадам» Ұлт жос­парының 12-қадамын орындау мақсатында 2015 жылы Әдеп кодексі қабылданып, әдеп жөніндегі уәкіл  қызметі енгізілді. Арнайы ереже бекітіліп, уәкілдің негізгі міндеттері айқындалды.

Бөкей ордасы ауданы әкімі аппаратының әдеп жөніндегі уәкілдің қызметін одан әрі жетілдіру, оның ішінде «Рухани жаңғыру» бағдарламасының «Өзгерістерді өзіңнен баста» кіші бағдарламасын іске асыруда 2019 жылға жоспар жасалып, аудан әкімімен бекітілді.

Негізгі мін­деттерімнің бірі – мемқызметшілерге консультациялық көмек көрсету. Мәселен, мемқыз­метшілер әртүрлі себепке байланысты мемлекеттік қызмет, сыбайлас жемқорлықпен күрес салаларындағы өзгерістерді толық меңгере бермеуі мүмкін (негізгі жұмыс ауқымдығы, жұмыс өтілі аздығы, құқықтық білімі болмауы себепті).  Сондықтан, олар жұмыс барысында шешім қабылдауда не өз құқығын қорғауда кібіртіктеп қалады. Осындай кезде уәкілдің міндеті – мемқызметтегі, сыбайлас жемқорлықпен күрес заңнамаларындағы өзгерістерді, Әдеп кодексі талаптарын түсіндіру. Аудан әкімдігі сайтында аудан әкімі аппаратының әдеп жөніндегі уәкілінің қабылдау кестесі жарияланған, әр сейсенбіде азаматтарды жеке қабылдау жүзеге асса, әр айдың бірінші сәрсенбісінде «Нұр Отан» партиясы аудандық филиалында қабылдау өткізіліп тұрады, күніне 8 сағат бойы есік ашық, кез келген мемқызметші өзін толғандырып жүрген сауал бойынша консультация алуына болады. Консультациялық көмек заңды және жеке тұлғаларға да беріледі.

Әдеп жөніндегі уәкілдің тағы бір функциясы – ҚР-ының мемлекеттік қызмет, сыбайлас жемқорлыққа қарсы  іс-қимыл саласындағы заңнамасын және Әдеп кодексін сақтау мәселелері бойынша мемқызметшілермен түсіндіру жұмыстарын тұрақты негізде жүргізіп, мониторинг және бақылау жүргізу.

Түсіндірме жұмыстары мемқызметшілерге лекциялар оқу, семинар-кеңестер өткізу арқылы, мониторинг бұқа­ралық ақпарат құралдарында  жарық көрген материалдарды зерделеу арқылы жүзеге асады.  Бақылау мемқызметшілердің әлеуметтік желілеріндегі аккаунттарына да жүргізіледі. Мемқызметшілер әлеу­меттік медиаларды пайдалануда мемлекеттік және басқа тілдерге, Қазақстандағы сан түрлі ұлттың салт-дәстүріне құрметпен қарау, балағат лексикасын қолданбау және мемқызметке сын келтіретін видео, фотоматериалдар жарияламау сынды талаптарды ескеруге міндетті. Бұл талаптар орындалмаса, қызметші тәртіптік жазаға тартылады.

Мемқызметшілердің қызметтік әдеп нормаларын бұзу фактілері бойынша жеке және заңды тұлғалардың өтініштерін қарау да, мемқызметшілердің құқығын қорғау да уәкілдің міндетіне жатады. Уәкіл бұндай жағдайларда даулы тараптарды қатыстырып, келіссөз жүргізіп, екі жақты татуластырады. Екі жақ келісімге келмесе, қызметтік тексеру жүргізіледі. Мемқызметші өз құқығын қорғау үшін мемлекеттік қызмет жөніндегі өкілетті органға не сотқа жүгінеді. Бұл ұзақ уақыт алады. Ал, бір деңгейдегі екі мемқызметші, басшы мен қызметкер арасындағы дауларда уәкіл келіссөз жүргізу арқылы жұмыс жасайды.

Сонымен қатар, ұжымдағы моральдық-психологиялық ахуалдың жай-күйіне мониторинг жүргізу мақсатында мемқызметшілер арасында жарты жылда бір анонимді сауалнама жүргізіледі. Нәтижесінде көзге көрінбейтін кейбір күрделі мәселеге, ұжымдағы мемқызметшілер арақатынасына, басшы мен қызметші қарым-қатынасына, қызметші құқығы­ның бұзылуына талдау жасалады.

Өткен жылдары ауданда мемқызметшілердің қызметтік әдеп нормаларын бұзу фактілері орын алған жоқ. Алдағы уақытта да жоспарға сәйкес мемқызметшілердің әдептілік деңгейін көтеру бағытында  іс-шаралар жүзеге асырылатын болады. 

 

Бөкей ордасы ауданы әкімі аппаратының

Әдеп жөніндегі уәкілі                                                                 Е.Ж.Айтқалиев


Мемлекеттік қызметшінің экономикалық және қаржы сауаттылығы

Кез келген қоғамда мемлекет қаржыны өзінің функциялары мен міндеттерін жүзеге асыру үшін, белгілі бір мақсаттарға жету үшін пайдаланады. Қойылған мақсаттарды іске асыруда қаржылық саясат маңызды рөл атқарады. Оны жасап, жүзеге асыру үдерісінде қоғам алдында тұрған міндеттерді орындаудың шарттары қамтамасыз етіледі, ол экономикалық мүдделерге ықпал жасаудың белгілі бір құралы болып табылады.

Елдің қаржы заңнамасының негізінде қаржылық ресурстарды жұмылдыру, бөлу және пайдалану жөніндегі мемлекеттің және басқа экономикалық агенттердің іс-шаралары қаржылық саясат деп аталады. Ол мемлекеттің экономикалық саясатының кұрамды бөлігі болып табылады. Қаржыны басқарудың бүкіл жүйесі мемлекеттің қаржылық саясатына негізделеді.

Қаржы жалпы экономикалық категория ретінде абстракцияның аз дәрежесі болатын (салықтардың, бюджеттің және т.б.) жеке қаржылық қосалқы категориялардан тұратындықтан, дербестіктің белгілі дәрежесімен саясаттың түрлерін: салықтық, бюджеттік, шаруашылық жүргізуші субъектілер, мемлекеттік қарыз алу саясатын және оларға сай келетін салықтық, бюджеттік, шаруашылық  жүргізуші субъектілердің, мемлекеттік кредиттік, қаржылық жоспарлау, қаржыны басқару, қаржылық құқықтық, сақтық механизмдерін бөлуге болады.

Қаржылық саясат экономикалық қатынастардан туындайды, өйткені қоғам қаржылық саясатты жасауда ерікті емес, ол өзінің мүмкіндіктеріне, объективті шындықтың шарттарына сүйенеді. Қаржылық қатынастар дамуының өзінің айрықшалықты заңдары болады. Қаржының логикасы дамуға өзара кері ықпал жасай алады: экономиканы тездетеді немесе оған кедергі жасайды.

Мемлекеттің қаржылық саясатының мазмұны экономикалық заңдардың іс-әрекетін ескере отырып және қоғамның даму міндеттеріне сәйкес қаржыны жоспарлы ұйымдастыру болып табылады. Қоғамдық дамудың әрбір кезеңінде қаржылық саясаттың өзіне тән белгілері болады, ол экономиканың жай-күйін, қоғамның материалдық және мәдени өмірінің толғағы жеткен қажеттіліктерін және басқа факторларды ескере отырып, түрлі міндеттерді шешеді.

Бүгінгі таңда қаржы сауаттылығын арттыру өзекті мәселеге жатады. Ақша және жеке жинақ қаражаты мен шығындарды басқару құралдарын білу түрлі қаржы айла-шарғыларынан қорғауға және қаржы үшін жеке жауапкершілікті арттыруға көмектеседі.

Қаржы сауаттылығын үйрену ешқашан кеш емес.

Қаржы сауаттылығы - бұл адамның өз табысы мен шығынын басқара алу, ақшаны дұрыс жарата, үлестіре білу және оларды сауатты түрде көбейте білу қабілеті. Басқа сөзбен айтқанда, қаржы сауаттылығы - қаржы жеткіліктілігіне қол жеткізіп, өзін дамыту деңгейін өмір бойы сақтай білу мүмкіндігін беретін білім. Қаржы сауаттылығын меңгерген адамдар экономикалық дағдарыс кезінде де әрі-сәрі күйге түспейді. Себебі оларда  кез-келген қиын жағдай үшін "алтын қоры" бар.

 

Бөкей ордасы ауданы әкімі аппаратының

Әдеп жөніндегі уәкілі                                                                 Е.Ж.Айтқалиев


Әдеп  пен мемлекеттік қызметші.

Қазақстан  Республикасы  Президентінің  2015 жылғы 29 желтоқсандағы № 153  «Қазақстан  Республикасы мемлекеттік қызметшілерінің әдептілік нормаларын және мінез-құлық қағидаларын одан әрі жетілдіру жөніндегі шаралар туралы»  Жарлығымен  Қазақстан Республикасы мемлекеттік қызметшілерінің әдеп кодексі  (Мемлекеттік қызметшілердің қызметтік әдеп қағидалары) бекітілген. Бұл Әдеп кодексі мемлекеттік қызметкерлердің қызметте және күнделікті өмірдегі жүріс-тұрыстарының жаңа стандартын бекітті. Соның негізінде енді мемлекеттік органдарда этика бойынша арнайы уәкілдер жұмыс істейді.  Әдеп кодексінің жаңа редакциясына сәйкес   Әдеп жөніндегі уәкіл  енгізілген. Әдеп жөніндегі уәкіл – қызметтік әдеп нормаларының сақталуын және мемлекеттік қызмет, сыбайлас жемқорлыққа қарсы іс-қимыл туралы заңнама мен Қазақстан Республикасы мемлекеттік қызметшілерінің әдеп кодексін (бұдан әрі – Әдеп кодексі) бұзушылықтардың профилактикасын қамтамасыз ету қызметін жүзеге асыратын, сондай-ақ өз функциялары шегінде мемлекеттік қызметшілер мен азаматтарға кеңес беретін мемлекеттік қызметші.

Енді мемлекеттік қызметшінің моральдік бет-бейнесі мен этикасына айрықша көңіл бөлінетін болады. Әдеп жөніндегі уәкіл сондай-ақ, өзі жұмыс істейтін мемлекеттік органда мемлекеттік қызметшілердің қызметтік әдеп нормаларын бұзу фактілері бойынша жеке және заңды тұлғалардың өтініштерін қарайды. Мемлекеттік қызметшілердің құқықтары мен заңды мүдделері бұзылған жағдайларда, оларды қорғауға және қалпына келтіруге бағытталған шараларды қабылдап, басқа да функцияларды жүзеге асырады.

Мемлекеттік қызметшілер жұмыс уақытынан бөлек, бос уақытында да Әдеп кодексін қатаң ұстауы міндетті. Оның ішінде қызметкер сыпайы, өзінің лауазымдық артықшылығын алға тартпайтын және жеке басының пайдасы үшін  қолданбайтын адал, баршаға ортақ қабылданған іскери стильге сай өзін ресми түрде ұстап, сабырлы, салмақты, ұқыпты болу тапсырылған. Ал, ең бастысы, мемлекеттік қызметшілердің  жеке өміріне  байланысты талаптар тіпті күшейген. Мемлекеттік қызметкерге жалпы қабылданған этикет сақтау өте маңызды, себебі ол тікелей адаммен жұмыс жасайды және әр түрлі  адамдармен қарым-қатынас жасау арқылы қызмет атқарады. Мемлекеттік қызметші болу – зор мәртебе, сондықтан мемлекеттік қызметші кәсіби біліктілікпен қатар, адамгершілік қасиеттерге де ие болуы тиіс. Мемлекеттік қызметке үміткер өз халқының алдындағы асқан жауапкершілікті сезіне отырып, мемлекеттік қызметтің беделін арттыруы қажет. Мемлекеттік қызметші өз өкілеттігімен, билігімен дұрыс қолдана білуі әрі әділ болуы керек. Ол мемлекеттік қызметте өз игілігі үшін емес, елінің береке-бірлігі үшін жұмыс істеуі, өз қалтасын мемлекеттік қаражатпен шатастырмауы, олардың аражігін ажырата білуі тиіс. Мемлекеттік қызметшінің өмір салты заң талаптарына толық сәйкес болуы шарт.

 

Бөкей ордасы ауданы әкімі аппаратының

әдеп жөніндегі уәкілі                                                                  Е.Ж.Айтқалиев